مونوګراف لیکنه وروستۍ برخه

_____________________
¤د سیمینار لپاره د چمتوالی مواد او لارې
‏_____________________
ددې لپاره چې ښه دفاع وکړو، نو لاندې ضروری ټکی باید به نظر کې ونیسو.
‏1-لږ تر لږه د یو بل ټولګیوال یا دکومې بلې څانګې د محصل دسیمنار غونډې ته ورشو او هغه وڅارو،چې څه ډول دی او سیمینار څه ډول مخته وړی؟ له څه ډول پوښتنو سره مخ کېږی شاید نور ګڼ څېزونه هم ورڅخه زده کړو.
‏2-دخپل دغه ملګری چې موږ یې سیمنار ته ورغلی یو،مثبت او منفی ټکی په نظر کې ونیسو چې له موږ نه هغسې پېښ نه شی.
‏3-له خپل لارښود استاد سره مشوره وکړو ، چې دمونوګراف کومې برخې په سیمنار کې راوړو او څه ډول یې شرح کړو؟
4-راکړل شوی وخت چې لنډ او تنګ دی ، څنګه دموضوع لپاره ووېشو،چې پخپل وخت ورڅخه خلاص شو او ژوری پلاوی مو خوله بنده نه کړی.
‏5-مهمې برخې له مونوګراف څخه راوباسو د هر فصل غورچاڼ په یوه پاڼه کې ولیکو او پوره مفهوم ترېنه واخلو چې ورباندې پوه شو.
‏6-امکاناتو ته وګورو،برق،كمپیوټر،پراجکټور لرو کنه؟،سیمنار دپراجکټور له لارې وړاندې کوو،که د چارټونو له لارې؟
‏7-که مو سیمنار په پراجکټور وی; نو سمدلاسه لاس په کار شئ که خپله پوهېږی خپله او که نه پوهېږئ بل داسې کس ته یې ورکړئ،چې په لیک مو سم پوه شی،هغه به تاسی ته په پاور پوینټ کې سلایډونه جوړکړی او ستاسی د خوښې سیمنار به درته ترتیب کړی او د سیمنار په ورځ هم درسره مرستندوی وی که په پیل کې د یو ایت ژباړې یا یو حدیث شریف او یا یوې بلې نیکې خبرې ته ځای ورکړئ درنښت به مو زیات شی،که دموضوع په اړه ځینې تصویرونه هم ولرئ بده به نه وی سیمنار او د پراجكټور صفحه به مو رنګینه وی.
‏8-که دا امکان نلرئ; نو درې لوی چارتونه او قلمونه راواخلئ او په ترتیب سره د سیمنار یادښتونه ورباندې په ښه لیک ولیکئ ،که خپل لیک مو سم نه وی په بل داسې چا ولیکئ چې ښه لیك لری;خو ټول مواد پکې ځای کړئ.
‏9-همدغه چارتونه یو ځل له ځان سره تکرار کړئ،د خپلو ملګرو او ټولګیوالو سره کېنئ چارتونه په دېواله ولګوی او فرض کړئ ،چې سیمنار ورکوی دا چاره به درسره مرسته وکری،چې جرئت مو زیات شی.
‏10-کوښښ وکړئ چې د چارت مواد د ځان تابع کړئ او کله هم د چارتونو مه تابع کېږئ.
‏11-خپلو ملګرو ته مو ووایی،چې د سیمنار مواد مو ستاسی وخت له پیل کېدو څو دقیقې وړاندې ولګوی،تاسی په ادب او احترام سره راشئ ځان ډاډه،ارام او خوښ وښیی، مېلمنوته ښه راغلاست او د استادانو درناوی وکړئ.هڅه وکړئ،چې ټول تالار په نظر کې ونیسئ خپل نظر یواځې یوه خوا مه ساتئ.
‏12-د موضوع د وړاندې کولو پرمهال بورډ،چارټ یا پراجکټور ته مه ګورئ یواځې سرلیکونه اخلئ او تشریح له ځان ورکوی هغه لښته یا خط کش چې په لاس کې مو وی بې ځایه مه خوروئ،ضروری ټکی پری به نښه کوئ او نور یې ځوړند نیسئ.
‏13-چې سیمنار مو ختم کړ،له ټولو څخه مننه وکړئ ځان ډېر خاکساره څرګند کړئ. او د ټولو پوښتنې په ځیر واورئ،ان له هغه سره ورته د معقول ځواب په لټه کې شئ،که فکر ته وخت نه وه، په چارټ ګوتې ووهئ،یو ګیلاس اوبه راواخلئ; خو تېز سوچ وکړئ او د ځواب په لټه کې شئ.
‏14-دغه ټکی که سم مراعت کړئ، نو طبیعی ده چې سیمنار مو مثبت ارزیابی کېږې; نو کله چې ژوری پلاوی ستاسی د ارایې او دفاع په اړه خپل نظر څرګند کړ; نو دلته ستاسې دخوشحالۍ د اظهار ځای دی له ټولو مننه وکړئ او هغه دوستانو ته مو ورشئ، چې د ګلو ګېډۍ په لاس ستاسې په انتظار کوی او ستاسې دفاع پای ته رسېږی.
وسلام.